DUM NR. 86

THEMA: NACHRED - Imitsch & Tratsch
Mit: Herbert Eigner - Interview * Brigitte Thurner * Daniela Dangl * Harald Jöllinger * Dominik Leitner * Ingeborg Schmid * Rudolf Kraus * Doris Nußbaumer * Marianne Schreder * Veronika Schneider * Daniel Fasser * Edeltraud Wiesmayr * Annemarie Regensburger * Christian Wolf * Franz Friedrich Kovacs * Werner Stangl * Verena Mermer * Mieze Medusa * Martin Peichl * Franziska Zussner * blume (michael johann bauer) * Iris Gassenbauer * Gerald Jatzek * Konny Rumpl * Sonja Tobl * Robert Eder * Angelika Polak-Pollhammer * Elisabeth Seiberl * Christine Rainer * Roswitha Perfahl * Gabriele Müller * Christine Tippelreiter * Angelika Woska * Christian Schreibmüller * ChristiAna Pucher * Richard Weihs * flimmern.fischen

Rezensionen: Annemarie Regensburger (Hrsg) - Reifes Korn keimt aufs Neue * Milena Michiko Flašar - Herr Kato spielt Familie * Simone Hirth - Bananama

Zeichnungen: Eckholz

Preis: EUR 3,30.- (EUR 5.- außerhalb Österreichs)
Förder-Abo (4 Ausgaben): EUR 13.- (EUR 20.- außerhalb Österreichs)
Bestellung: Online, per E-Mail (dummail@gmx.at) oder unter 0664 / 4327973.


DUM-Interview: "DIALEKT IST IMMER GEFÜHL" mit Herbert Eigner



Leseproben aus DUM 86:


SO KAUNNS DA GEH
(Herbert Eigner)

wiar a gsund woa
haums eam graung gredt

wiar a graung woa
haums eam dod gsogt

wiar a gstuam woa
haums bei seina leich
iwas wedda dischguriad



SÜM FIA SÜM.
(Dominik Leitner)

Oiwei wieda hob i's dia voagsogt, Süm fia Süm.

Do-mi-nik.
Do - mi - nik.

Owa du hostas ned gschofft. Dei kloana Mund woa woi nu ned so weit. A boa moi hostas vasuacht, des hob i gmerkt, oba gschofft hostas nia.

I kaun mi nu guad draun erinnern, an den Nochmittog mit dia. Wiar i di bsuacht hob, di und dei Mama. Wiar i mi mit dia gschpüt hob. Wiar i di daun de gaunze Zeit am Oam ghobt hob. Und dia gaunz laungsaum, Süm fia Süm, zerst owei dein Naum vorgsogt hob, bevor i dia unbedingt mein' unterschummin woitad.

Du host glocht, do draun kaun i mi nu erinnern. Du host mi aungschaut, host ma zuagheat, wiar i imma und imma wieda unsre Naumen gsogt hob. Süm fia Süm. Du host ma zuagheat und host glocht.

Viar Tog späda bist nimma aufgwocht.
Oafoch so.
...



ANS SOG I EICH
Rudolf Kraus

waun's aundas gwesn warat
daun tatat i heit
auf da fäun haut lign
owa ollawäu kummt ma
da konjunktiv in'd kwean



IMITSCH
(Daniel Fasser)

I bi in am kloan Oascht a da Heach aufgwochsn. Aso am griawign Bergdorf, a Nest wia mas vo Heidi kennt und in an niadn Touri-Zedl find'. Doscht hots mi ameascht taiglisch guat dunkt. Meine Groaßötan ham a auf mi gschaug, wenn meine Ötan mi zwengs Orwetn nit an Acht kopt hom. Merawaö hots aufn Ofnbankö droff a gfiarigs Platzl fi mi gebn. Da Woid wå mei zwoats Dahoam. Im Winta håb i ma voa da Hausti meine Schi uzochn und bi losgfohn. Is si a tiam ausgånga. Wo scho a gschtiaschts Äaschtä. Dann hat si owa nåch da Haupschui de Frog gstöht, wohi I weida gea soid. De Borg in Innschbrug is dånn woan.

Schnell hab i erkennen müssn, dass man mi in da großn Stadt mit mein Dialekt nit so wirklich versteht. ...



HEAZ IS MAUNCHMOI ADUT
(Martin Peichl)

(1)

Nachred
is wia a Echo
oba di Wänd san
gaunz dünn
im Dorf
nur im Kölla
head ma schlechta
im Kölla head ma
oft nix
...



SCHWOAZZE
(Roswitha Perfahl)

A Übaroschung hot a gsogt.
Net, wia soin uns net schreckn, des hot a net gsogt, wie domoils bei da Pankarin. Net schreckn, de is eh liab.
Oda amoi mit so an Beiton, so wia a Wornung, wia soin uns net wundern, und net deppat redn, wia bei da Ameriganerin.

Er wiad do net heiratn, hot letztsmoi de deppate Christl gsogt im Kurs.
Nia net! Da Michi und Heiraten, mit dem Spießazeig braucht ma eam net kumma. Oba wer waaß? Ea wiad a öda. Des warad wirkli a Übaroschung.

A klane Asiatin, des warads, de haum ma no net ghobt. De schaun olle so sauba aus, a wauns ned so sauba waradn, schauns trotzdem olle imma sauba aus. Puppengsichta, Porzellanhaut, dunkle Augn, klans Kindanasal, scho scheen.

Jetzt ohne an Untaton, nua: Wia soin uns net wundan. Net bled schaun und bled redn, woa net in dem Ton mit dema "eine Überraschung" gsogt hot, oda? Na, hob i net gheat, hoda a net gsogt. Des hätt ma scho kennt.
...