DUM NR. 102

THEMA: KORRUPT
Vo Schwoazgöd bis Mafia
Mit: Raoul Eisele – Interview * Daniel Stögerer * Margarita Kinstner * Irene Zoller * Sabrina Lydia Winkler * Günther Pilarz * Hans Kumpfmüller * Hannes Thauerböck * Clemens Kogler * Veronika Schneider * Benjamin Rizy * Daniela Dangl * Franziska Zussner * Annemarie Regensburger * Carmen Ramoser * Hannelore Futschek * Christine Tippelreiter * ChristiAna Pucher * Christine Rainer * Renate Schiansky * Engelbert Lasinger * Werner Höller * Lea Jehle * B. Jetschko * Mario Huber * Malte Borsdorf * Sebastian Galyga * Andrea Kerstinger * flimmern.fischen

Rezensionen: Doris Leeb – Iaz owa! * Rudolf Kraus – Ausgewählte Sprachminiaturen * Christian Moser-Sollmann – Ohne Wham! und Abba * Marica Bodrožić – Die Arbeit der Vögel

Zeichnungen: Eckholz

Preis: EUR 4.- (EUR 7.- außerhalb Österreichs)
Förder-Abo (4 Ausgaben): EUR 15.- (EUR 20.- außerhalb Österreichs)
Bestellung: Online, per E-Mail (dummail@gmx.at) oder unter 0664 / 4327973.


DUM-Interview: "SEHNSUCHTSVERSTÄRKER ODER GEDICHTE ALS ALLTAGSFLUCHTWEG" mit Raoul Eisele



Leseproben aus DUM 102:


PASS DRAUF AUF
(Daniel Stögerer)

As Easchti

Hätt i sou weidawuaschtln suin wia du? Mit deini zwanzg Kia und däi zwoa maroudn Ferguson-Traktorn? Soboid da easchte eigaungan wad, hätt i Konkurs aumödn kinnan. Na, iagndwea hout wos äindan mäissn, und grod du host ma oiwei eipflaunzt, dass ma koani hoibn Sochn mochn sull.
Schau ned sou, ois wissast vo nix. Kaunst di nau auf die Huizhittn erinnan? Duat drüm is gstaundn, wou ma hiaz die Maschinenhalle hom. Kloa und fäinstalous woas, und auf die teertn Bräidlwäind san Heiräichn und a oida Dräischfläigl ghäingt. Aungeblich nau vo deini Groußöltan. In da Vuikschui woan ma nau ned amol mitn gaunzn Alphabet durch, dau hob i scha bam Huizeischlichtn höfn mäissn. Jeds Mol die gleichi Prozedur: Du parkst in Ferguson saumtn Kippa vur da Hittn und stöullst vur da Tia die Kreissog auf. Die Muada klaub da die meterlaungan Scheida vom Kippa owa, du vierdlst as mit da Sog und i trogs in die Hittn und schlichts zu an Stoß auf. Söm, es wor as easchti Mol, dass i mithöfn hob mäissn, houst ma die easchti Schor nouch da Läingswaund aufgläigt und ma erklärt, dass i an neichn Stoß aufongan sul, sobold da easchti ungefähr so groß wia i söwa wiad.
Und scha is lousgaungan. Die Kreissog hout gsungan und kiat, sou laut, dass ma näimsn Oawatn nix räidn hout kinnan. Und wal vü Huiz am Kippa woa, houst du a gscheits Tempo vurgläigt.
...



FAMÜLIENGSCHICHTN
(Margarita Kinstner)

mei mama
hod ian firaschein
nua kriagt
weu mei papa
a steiaprüfa gwesn is
waunst bei meina freindin
a aug zuadruckst
beim kreisvakea
hoda zum bsitza
dera foaschui gosgt
daun druck i bei dia
zwaa augn zua
...



Hans Kumpfmüller

mia
homd zwoa scho amoi
an konzla
kobd
dea oiwei
a maschal
kobd
hod
owa
sgäid sgäid
hod bei uns
nu nia
a maschal
kobd




Franziska Zussner

domols
is da öltansprechtog
zum morktplotz vakumman
für drei glasln honig
an lab brot
und kasnudl ols draufgob
werd da bua
den vurzug wohl kriagn
den umschlog bittschen
erst daham aufmochn
a klane aufmerksomkeit
späta kraht ka hohne
mehr noch an zeignis
mocht oba auf jedn foll
a guats büld
bam lehrherrn und
in da vawondtschoft



MOZART
(Benjamin Rizy)

wia san da wolfgang amadeus
und da rainer maria
und da johann nepomuk
owa da karl heinz
und da heinz christian
des samma hoid a



MORDEN ODO MODERN
(Carmen Ramoser)

Frioh hots di beasen Zauberer, Raubritto, Stiafmiato, Kindsentführo, tyrannischn Könige und Königsmördo, Hexen und Henker gebn, de es Lebn fa di Leit schwar gemocht und Heldn a Chonce gebn hom. Wos isch heintzutoge aus ihmene geworden? Konn man no guat beas sein, wenn es Handys mit Internet und Newsfeeds gib, Politiko und Staatnbünde, Flugzeige und für jedn a Spitol? Schau her:
Emilia Bronära Krakleen De Veneso Krünk, di Oma fa do Fürstenfamilie Krünk, ungezogn mit an longen, schworzn Kleidl, reißt di Tire au und schreit: "Wos folltan enk ein, die schmiedeeisonen Kandelaber wekzuschmeißn? Seit Johrhunderte hom sich di Leit vor Ongscht in di Hosn gemocht, wenn se ins Schloss kemmen sein und die Körzenflommen brennen gsegn hom!"
"Jo und deswegn sein se a volle aus do Mode", ontwortet do Fürst Ervurmius De Veneso Krünk, der mit seino Frau, do Fürstin Silva Nera De Veneso Krünk, bam friahsticken sitzt und di Zeitung lest. "Heintzutoge konn koan Mensch mehr epas mit an Kandelaber unfongen."
"Inzwischen hom se sogor Strom erfunden, magari hosch fam sem mol kheart", witzlt sei Tochto, Vrodovria Kreslik De Veneso Krünk, während se aufs Handy schaug.
"Holt di Gosche odo du konsch mo nomol olle Foltomethodn aufsogn."
...